Malmin spelar folkemusikk frå Suldal og Bjerkreim i Rogaland, som dei via arkivopptak har lært av dei gamle meistarane i området. Nokon av slåttane prøver dei å leggja så tett opp til utøvaren som mogleg, medan andre har dei bevisst dratt i ei anna retning. Dei nyttar tradisjonelle instrument som hardingfele, vanleg fele, langeleik og munnharpe, men òg gitar og mandolin. Saman med gjestevokalist Åshild Vetrhus byr dei på alt frå springarar og hallingar til slåttestev og religiøse folketonar.

Duoen Malmin består av dei to erfarne musikarane Olav Christer Rossebø, kjend frå band som Lady Hardanger, Frøkedal og familien og Bergen Mandolin band, og Anders Sundsteigen Hana frå Naaljos Ljom og The End, som og driv folkemusikkserien "Gorrlaus" i Stavanger.

Åshild Vetrhus frå Suldal er kanskje mest kjend frå trioen Tindra, i tillegg til julesalmeprosjektet «Frå høge himmel» med tradisjonelle julesalmar frå Rogaland.

Anders Sundsteigen Hana - mikrotonal gitar, langeleik, munnharpe
Olav Christer Rossebø - fele, hardingfele, mikrotonal mandolin, triangel
Åshild Vetrhus - vokal