Bak namnet “Eigentleg andre instrument senior” gøymer det seg ein stor gjeng særs røynde folkemusikarar på trekkspel, toradar, fele, hardingfele o.a., men i dette laget spelar alle instrument dei ikkje kan. Det vil seie at trekkspelarar spelar fele og omvendt, toradarutøvarar spelar gitar, og andre felespelarar spelar cello eller bass. Laget vert leidd av primus motor Øyvind Sandum og har gjort furore i samspelklassene på både landskappleik og landsfestival, der ein strålande 18. plass (av 21 lag) er førebels høgdepunkt!

Kvelden startar med ein liten konsert; han må vera liten, for repertoaret til laget er ikkje spesielt utbygd enno. Deretter vert det dansespel på dei eigentlege instrumenta til utøvarane før laget avsluttar med å syne fram kunstene sine som spelemannslag atter ein gong.