Felespelar Tara Breen fortener skildringa “a musical wizard”, som Music Network gav ho, til fulle. Ho har til saman 11 All Ireland-titlar som solist på fele, fløyte og saksofon, og ein mengd andre prisar og utmerkingar. Alt dette førte til at ho som ungt talent fekk det ærefulle oppdraget å spela i Dublin Castle under statsbesøket til dronning Elisabeth II av England i 2011. Tara Breen har utover solokarriera medverka på ein mengd plater, og gjestar med javne mellomrom på konsertar med artistar som Carlos Nunez, Stocktons Wing og Trí Tones, men det kanskje fyrst og fremst som fast medlem av den legendariske gruppa “The Chieftains” mange kjenner til ho.

Pádraig Rynne reiknast som ein leiande kraft innanfor irsk musikk, og er grunnleggjande medlem av kjende band som Notify og Guidewires. Magasinet fRoots omtala han som "one of the freshest sounds in Irish music" og den virtuose musikaren og profilerte komponisten vert reikna som kanskje Irlands beste utøvarar på concertina. Med en master i musikkteknologi, og ein ibuande attrå for å eksperimentere i ulike sjangerar, er Pádraig anerkjend for sin forfriskande nyskaping av den irske tradisjonen, og for sitt banebrytande band Notify, omtala av New York Echo som "cinematic in scope".

Jim Murray har vore ein av de mest ettertrakta og travlaste musikerne frå sin generasjon de siste to tiåra. Han vart profesjonell musiker på heiltid som 18-åring og vert m.a. reikna som Sharon Shannons “right hand man” etter å ha turnert med ho på alle verdas kontinent. Han har også spelt konsertar og gjort innspelingar med artistar som Sinead O’Connor, Steve Earle, Shane McGowan, Altan og Mary Black for å nevne nokon få.

Trioen frå den grøne øya gav ut plata "Nasc" i 2021, ein utgjeving som av særs mange vert sett på som ein av dei beste albuma med tradisjonell irsk musikk dei siste åra. Det er med andre ord tre utruleg talentfulle og kreative folkemusikerar som kjem til Riksscenen, musikerar som lever for både tradisjon og innovasjon i musikken sin. Dei formar melodiar frå både fortid og nåtid saman til noko dynamisk og uimotståeleg, så her kan ein vente ein konsert som spenner frå alt irsk musikk har å melde, frå det milde og vare til det rytmisk spenstige og ikkje minst alt det som finst i mellom.

Tara Breen - fele
Pádraig Rynne - concertina
Jim Murray - gitar